Joriy yilning 4-may kuni davlatimiz rahbarining Buxoro viloyatiga tashrifi yakunlari yuzasidan oʻtkazilgan yigʻilishda berilgan topshiriqlar ijrosini taʼminlash, hududlarda jamoat tartibi, fuqarolar xavfsizligi, mol-mulklarning daxlsizligi, yoʻllarda harakat xavfsizligini taʼminlash borasida amalga oshirilayotgan profilaktik tadbirlarni yangi bosqichga olib chiqish, ayniqsa tungi vaqtlarda nazorat tadbirlarini kuchaytirish maqsadida viloyat hokimi Botir Zaripov boshchiligidagi sektor rahbarlari tomonidan Buxoro shahar hududida «Xavfsiz tun» tadbiriga start berilib, tadbirga jalb etilgan kuch-vositalar, huquq-tartibot organlari xodimlari hamda jamoatchilik vakillari ishtirokida kengaytirilgan tungi Yoʻriqnoma oʻtkazildi.

Yoʻriqnomada, prokuratura, ichki ishlar, Milliy gvardiya, Favqulodda vaziyatlar boshqarmasi hamda mahallalar «yettilik» vakillari ishtirok etishdi.

Bunda, xizmatga jalb qilingan xodimlarga jinoyatchilikni barvaqt oldini olish, huquqbuzarliklarga qarshi keskin kurashish, mahallalarda xavfsiz muhitni taʼminlash, jinoyatlardan xoli hududga aylantirish borasida tegishli koʻrsatma va topshiriqlar berildi.

Shundan soʻng, Buxoro shahri hududida kriminogen vaziyatni barqarorlashtirish, jinoyatchilikni oldini olish, jamoat tartibi hamda yoʻl harakati xavfsizligini taʼminlash maqsadida keng qamrovli profilaktik tadbirlar oʻtkazishga kirishildi.

Buxoro viloyati IIB Axborot xizmati