Shu munosabat bilan Ichki ishlar vaziri general-leytenant Poʻlat Bobojonov boshchiligida mazkur tadbirlarning ochilish marosimi oʻtkazildi. «Yangi Oʻzbekiston bogʻi»da ikki ming nafar yoshlar ishtirokida, bir vaqtning oʻzida Qoraqalpogʻiston Respublikasi, Toshkent shahar va viloyatlar markazlarida onlayn tarzda 3 km masofaga yugurish marafoni boʻlib oʻtdi. Shuningdek marafon doirasida «Vatanparvarlik marshi» tashkillashtirildi.

Ushbu sogʻlom turmush tarziga chorlaydigan «Xavfsiz hayot uchun birlashaylik!» yoshlar marafoni tadbirining ishtirokchi va mehmonlari uchun koʻngilochar dasturlar namoyish etildi. Gʻolib va nominatsiya egalariga diplom, qimmatbaho sovgʻalar hamda pul mukofotlari topshirildi.

Eslatib oʻtamiz!

«Xavfsiz hayot uchun birlashaylik!» shiori ostida oʻtkaziladigan tadbirlar doirasida quyidagi nominatsiya va koʻrik-tanlovlar oʻtkaziladi:

– «Yoshlar jinoyati va huquqbuzarligidan holi mahalla» nominatsiyasi;

– «Yoshlarga eng koʻp yordam koʻrsatgan tadbirkor» nominatsiyasi;

– «Xavfsiz va ravon yoʻl» nominatsiyasi;

– «Ichki ishlar vaziri kubogi» voleybol boʻyicha sport musobaqasi;

– «Zakovat» intellektual oʻyinlari;

– «Dillarda vatan madhi» shiori ostida qoʻshiq tanlovi;

– «Dillarda vatan madhi» shiori ostida sheʼriyat tanlovi;

– «Yosh huquqshunos» koʻrik-tanlovi.

23-iyun kuni tadbirning yakuniy bosqichi Toshkent shahrida boʻlib oʻtadi. Ushbu tadbirga yuqorida aytib oʻtilgan 8 ta nominatsiya va koʻrik-tanlovlarning respublika gʻoliblari taqdirlanadi hamda konsert dasturi namoyish etiladi.