IIV Akademiyasi rahbari polkovnik Rustam Xatamov ichki ishlar tizimida koʻp yillar samarali xizmat qilgan faxriylar holidan xabar oldi
2024-05-10 09:00:00 / Yangiliklar
Kasbga sadoqat, fidoyilik, halollik singari fazilatlar insonni ulugʻlaydi. Xotira va qadrlash kunida ichki ishlar tizimida koʻp yillar samarali xizmat qilgan ana shunday faxriylar holidan xabar olindi.
Ichki ishlar vazirligi akademiyasi rahbari Rustam Xatamov isteʼfodagi polkovnik Timur Saitbayev xonadonida boʻlib, soha faxriysini bayram bilan qutladi. Suhbat chogʻida uning sharafli hayot yoʻli, qizgʻin mehnat faoliyati, ichki ishlar organlari uchun malakali kadrlar tayyorlashga qoʻshayotgan ulkan hissasi eʼtirof etildi.
– Akademiya men uchun ikki hissa qadrli maskan. Otam ham koʻp yillar ushbu dargohda mehnat qilganlar. Bundan hamisha koʻnglimga faxr tuyaman. Inson uchun oʻz mehnatlarining sharofatini koʻrishdan ortiq baxt yoʻq. Shogirdlarim yoʻqlovidan juda xursand boʻldim, – dedi u.
Uchrashuv davomida soha faxriysiga samimiy tilaklar bildirildi. Yoshlarning jonkuyar ustozi davlatimiz tomonidan keksa avlod vakillariga koʻrsatilayotgan ulkan eʼtibor va gʻamxoʻrlikni eʼtirof etib, akademiyadagi yangilanishlar, professor-oʻqituvchilar uchun yaratilayotgan shart-sharoitlardan mamnunligini aytdi.
Bayram munosabati bilan akademiya vakillari IIV Markaziy gospitalida salomatligini tiklayotgan Anvar Devyatovni ham yoʻqladilar. Koʻp yillar ichki ishlar organlari tizimida xizmat qilgan Anvar aka nafaqaga chiqqandan soʻng, boy hayotiy tajribasini yoshlar taʼlim-tarbiyasiga bagʻishladi. Koʻplab shogirdlarni kamolga yetkazdi.
Shuningdek, bayram munosabati bilan general mayor Tojiddin Jalilovning umr yoʻldoshi Gulsara ayaga ham izzat-eʼtibor koʻrsatildi.
Tabarruk yoshni qarshi olgan onaxonga bayram tilaklari va sovgʻalari ulashildi. Marhum ustozning xayrli amallari, insoniy fazilatlari, zahmatli mehnatlari yodga olindi.
IIV Akademiyasi Axborot xizmati