Ichki ishlar vazirligi Maxsus tayyorgarlik oʻquv markazida yetishtirilgan xizmat itlar — koʻrgazma gʻolibi
2024-05-06 13:45:00 / Yangiliklar
Oʻzbekiston Kinologiya federatsiyasi tomonidan 2024-yilning 4-may kuni barcha zotga mansub itlarning “Toshkent-2024” koʻrgazmasi tashkil etilib, unda Qozogʻiston va Qirgʻiziston Respublikalari va yurtimiz fuqarolari, barcha huquqni muhofaza qiluvchi organ va harbiy tuzilmalarga tegishli 35 zotga mansub 300 dan ortiq itlarning zot standarti talablariga mosligi, eksterer sifatlari va psixologik xulq-atvori xorijlik ekspertlar tomonidan baholab borildi.
Vazirlik Maxsus operatsiyalarni muvofiqlashtirish boshqarmasi Maxsus tayyorgarlik oʻquv markazi kinolog xodimlari oʻzlariga biriktirilgan 5 bosh xizmat itlari bilan koʻrgazmada muvaffaqiyatli ishtirok etishdi.
Jumladan, Sharqiy yevropa ovcharkasi zotli itlar oʻrtasida safdor D.K.Kurbanovga biriktirilgan “Germiona-Brenda” laqabli xizmat it, Belgiya ovcharka zotli itlar oʻrtasida safdor N.R.Baxramovga biriktirilgan “Boni” laqabli xizmat it va safdor Yu.A.Grechkinaga biriktirilgan “Vega” laqabli kuchuk bola zotlari oʻrtasida faxrli birinchi oʻrinlarni egalladi hamda “Best” (Eng zoʻrlar) yoʻnalishiga yoʻllanma oldi.
“Best” yoʻnalishida oʻz zotlari boʻyicha chempion boʻlgan barcha itlar oʻrtasida “Boni” laqabli xizmat it faxrli 1-oʻrinni, “Germiona-Brenda” laqabli xizmat it faxrli 2-oʻrinni, kuchuk bolalari oʻrtasida “Vega” laqabli kuchuk bola barcha zotlar orasida faxrli 3-oʻrinni egalladi.
Koʻrgazma tashkilotchilari tomonidan gʻolib itlar egalari diplom va esdalik sovgʻalar bilan taqdirlandilar.
IIV Maxsus operatsiyalarni muvofiqlashtirish boshqarmasi Maxsus tayyorgarlik oʻquv markazi