Tuman hokimi Osiyo yoshlar o‘yinlari sovrindorini qutladi
2025-10-30 16:30:00 / News
Avval xabar berganimizdek, Bahrayn poytaxti Manama shahrida o‘tkazilgan III Osiyo yoshlar o‘yinlarida O‘zbekiston tumanilik yosh yengil atletikachi Muhammadaziz Nosirov bosqon uloqtirish yo‘nalishida kumush medalini qo‘lga kiritdi.
16 yoshida salmoqli natijaga erishgan umidli sportchi bugun o‘zi tug‘ilib o‘sgan maskan, “Namuna” mahalla fuqarolar yig‘inidagi xonadonida tantanali kutib olindi.
Tadbirda tuman hokimi Ravshanbek Begmatov, sportchining oila a’zolari, ustoz va murabbiylari, do‘stlari hamda mahalla ahli ishtirok etdi.
Tuman rahbari Muhammadazizni mazkur yutug‘i bilan samimiy qutlab, uning zafari nafaqat bargacha quvonch ulashgani, balki tengdoshlariga munosib namuna va ruhlanish bo‘lganini ham ta’kidladi. Sportchiga kelgusi bahslarda ham ulkan g‘alaba va zafarlar yor bo‘lishini tilab, uning ota-onasi va ustozlariga minnatdorlik bildirdi.
Tadbir davomida Osiyo o‘yinlari sovrindori va uning ota-onasiga alohida e’tibor ko‘rsatilib, tuman hokimligining esdalik sovg‘alari topshirildi.
Qayd etish joiz, ayni kunlarda tahsil va mashg‘ulotlarini Respublika Olimpiya va paralimpiya sport turlariga tayyorlash markazida davom ettirayotgan Muhammadaziz Nosirov besh yildan buyon ayni sport turi bilan muntazam shug‘ullanib kelmoqda.