O‘zbekiston tumanida joriy yil boshida 71 ta mahallada o‘tkazilgan xatlov orqali 55 ming 369 nafar “yoshlar balansi” shakllantirildi va ularning muammosi, individual qiziqishi va iqtidoridan kelib chiqib, o‘tgan davr mobaynida qator tizimli ishlar amalga oshirildi.

O‘tkazilgan xatlov asosida “og‘ir” toifadagi jami 531 nafar ishsiz yoshlar 28 nafar rahbarlarga nomma-nom biriktirildi. Mutasaddi rahbarlar o‘zlariga biriktirilgan 531 nafar yoshlarning muammolarini o‘rganish maqsadida ularning barchasi bilan uchrashuvlar o‘tkazdi va turli tarmoqlar bo‘yicha mazkur yigit-qizlarning bandligi ta’minlandi. 

Tuman bo‘yicha jami 522 nafar yoshlar huquq-tartibot organlarining 29 nafar mas’ullari tomonidan otaliqqa olindi. Biriktirilgan mas’ullar tomonidan otaliqqa olingan yoshlarning barchasi bilan suhbatlar o‘tkazildi. Natijada 364 nafar yoshlarning  ijtimoiy va maishiy muammolari “mahalla yettiligi” hamda tegishli tashkilotlar hamkorligida hal etildi. Xususan, 214 nafar yoshlar bilan profilaktik tadbirlar tashkil etilib, 150 nafar yoshlarning doimiy bandligi ta’minlandi.

Yil davomida yoshlarning tadbirkorlik bilan shug‘ullanishlariga qaratilgan 166 ta biznes loyihalariga 10 mlrd 314 mln so‘m imtiyozli kreditlar ajratildi.

Prezidentimizning “Yoshlar tadbirkorligini rivojlantirish va bandligini ta’minlashga doir qo‘shimcha chora-tadbirlar to‘g‘risida” gi PQ-62-son qarori ijrosi doirasida AT “Aloqabank” tomonidan ishlab chiqilgan 2025-2027 yillarga mo‘ljallangan “Yoshlar biznesi” dasturiga muvofiq 62 nafar yoshlarga 6 mlrd 870 mln so‘m kredit mablag‘lari ajratildi.

Shuningdek, “O‘zmilliybank” AJning oliy ta’lim tashkilotlari bitiruvchilarining bandligini ta’minlashga ko‘maklashishga qaratilgan “Kelajakka qadam” dasturi doirasida shu kunga qadar jami 9 nafar oliy ta’lim muassasalari bitiruvchilariga 170 mln. so‘m miqdorida kredit mablag‘lari ajratildi.

O‘zbekiston tumanida joriy yilda 432 nafar yoshlar “Yoshlar daftari”ga olinib, ularning 419 nafariga manzilli va maqsadli yordamlar ko‘rsatildi. Xususan, daftardagi 166 nafar yigit-qizlarning to‘lov-shartnoma pullari to‘lab berildi, 52 nafar yoshlar doimiy ish o‘rinlariga joylashtirildi, 52 nafar yoshlarga tadbirkorlik faoliyatini boshlash uchun kredit ajratildi. 91 nafar yoshlar o‘zini-o‘zi band qilishi uchun zaruriy mehnat anjomlari bilan ta’minlandi. Salomatligida muammosi bor bo‘lgan 4 nafar bemor yoshlarning davolanishi uchun ijtimoiy yordamlar ko‘rsatildi. Mazkur maqsadlar uchun “Yoshlar jamg‘armalari” orqali jami 1 mlrd. 129 mln. so‘m mablag‘ yo‘naltirildi. 

“Yoshlar bandligi dasturi” ijrosi doirasida 3 613 nafar yoshlarning bandligi ta’minlandi.

Prezidentimizning “Yoshlarga yer ajratish orqali ularning daromadlarini oshirish va bandligini ta’minlash, shuningdek, yangi yer maydonlarini o‘zlashtirish chora-tadbirlari to‘g‘risida”gi qarori ijrosi doirasida yer olib, dehqonchilik qilish istagida bo‘lgan 1 302 nafar yoshlarga 277,6 gektar yer maydonlari ajratib berildi. Avval ishsiz bo‘lgan mazkur yoshlarning 452 nafari o‘zini o‘zi band qilish orqali, 850 nafari esa yuridik shaxs tashkil etmagan holda “Dehqon xo‘jaligi” sifatida ro‘yxatdan o‘tkazilib, bandligi ta’minlandi.

Yoshlarning bo‘sh vaqtini mazmunli tashkil etish bo‘yicha ham yil davomida salmoqli ishlar amalga oshirildi. Xususan, “Besh tashabbus olimpiadasi”ning turli bosqichdagi tadbir va musobaqalarida jami 51 ming 860 nafardan ziyod yoshlar qamrab olindi. 

“Besh muhim tashabbus” doirasida mahallalarda 334 ta yangi to‘garaklar tashkil etilib, ularga 5 951 nafar yoshlar jalb etildi.

Yoshlarning bo‘sh vaqtini mazmunli tashkil etishga qaratilgan 2 ming 100 dan ortiq tadbirlar tashkil etilib, ularda 55 370 nafardan ziyod yoshlar qamrab olindi.