Тадбиркорликка кенг йўл очилмоқда
2025-09-05 18:50:00 / News
Қува туманида тадбиркорлик фаолиятини ривожлантириш ва янги иш ўринларини яратиш мақсадида амалий ишлар изчил давом этмоқда. Шу йўналишда туманда тадбиркорлар ҳамда тадбиркорлик фаолиятини бошлаш истагида бўлган фуқаролар билан очиқ мулоқот ўтказилди.
Учрашувда туман ҳокимининг биринчи ўринбосари Жаҳонгир Закиров ҳамда туман прокурори Санжарбек Аминжонов иштирок этдилар. Мулоқот жараёнида тадбиркорликни қўллаб-қувватлаш, янги ташаббусларни амалга ошириш ва фуқароларнинг бизнес ғояларини рўёбга чиқариш масалаларига алоҳида эътибор қаратилди.
Шунингдек, Турк маҳалласи ҳудудида ташкил этилган кичик саноат зонаси учун ажратилган ер майдонлари, бу ерда тадбиркорлар учун яратилган қулай шарт-шароитлар ва имтиёзлар ҳақида атрофлича маълумот берилди. Ушбу майдонлардан самарали фойдаланиш ҳамда ер майдонларини ажратиш тартиби ҳақида тушунтиришлар берилди.
Бундай очиқ мулоқотлар тадбиркорлар учун янги имкониятлар эшигини очиб, туманда бизнес муҳитини янада яхшилашга, аҳоли бандлигини таъминлаш ва иқтисодий тараққиётни жадаллаштиришга хизмат қилади.