Shu munosabat bilan O‘zbekiston Respublikasi Energetika bozorini rivojlantirish va tartibga solish agentligida tadbir bo‘lib o‘tdi.

Unda vatanparvarlik namunasi sifatida Amir Temur, Jaloliddin Manguberdi, Temur Malik kabi buyuk ajdodlarimizning bosib o‘tgan boy maʼnaviy merosi, so‘nggi yillarida harbiy sohada erishilgan yutuqlar, yurtimizda yoshlarni harbiy-vatanparvarlik ruhida tarbiyalashda amalga oshirilayotgan ishlar haqida so‘z yuritildi.

Tadbirda taʼkidlanganidek, Vatan ko‘zning qorachig‘iga o‘xshaydi. Unga biror yot narsa yaqinlashganda qovoqlar, kipriklar sergak tortadi, umuman, jism mana shu kichik aʼzo himoyasiga shaylanadi. Har bir fuqaro, ayniqsa, yoshlar O‘zbekiston himoyasiga aqli, kuchi bilan shay tursa, tashqi va ichki tahdidlar o‘z kuchini yo‘qotishi shubhasiz.

Ushbu bayram, nafaqat harbiy xizmatchilar, balki ayni vaqtda armiya saflarida o‘z burchini o‘tab qaytgan vatandoshlarimiz balki o‘z oilasining qo‘rg‘oni bo‘lgan barchaning ham bayramidir.

Xalqimizning xavfsizligi, tinchligi va osoyishtaligini saqlash bugun ham, kelajakda ham eng ustuvor vazifamiz bo‘lib qoladi. Chunki faqatgina tinchlik-osoyishtalik mamlakatimizning har tomonlama rivojlanishining asosiy kafolatidir.