“Olima ayollar” ilmiy loyihalar tanlovi natijalari boʻyicha taqdirlash marosimi boʻlib oʻtdi
2024-04-04 15:00:00 / Vazirlik yangiliklari
Tadbirni Oliy taʼlim, fan va innovatsiyalar vaziri Qoʻngʻirotboy Sharipov kirish soʻzi bilan ochdi.
– Bugun ayollarning ilm-fandagi roli, ularga yaratilgan imkoniyatlar, ulardan kutilayotgan natijalar juda katta. Umid qilamizki, bugun taqdirlanadigan loyihalarimiz natijasida ham katta yutuqlarga erishamiz. Bu kabi tadbirlar olima ayollarimizning jamiyatdagi mavqeini yanada koʻtarish, ularning barcha sohadagi faolligini oshirishga xizmat qilishiga ishonchim komil.
Mazkur tanlov Prezidentning “Oila va xotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida” 2022-yil 7-martdagi PF-87-son farmoniga muvofiq ilmiy faoliyatga oid davlat dasturlari doirasida 2021-yildan beri muntazam oʻtkazib kelinmoqda. Tanlovlar natijasida oʻtgan yillar mobaynida umumiy qiymati 120,0 mlrd soʻm miqdoridagi 92 ta loyiha moliyalashtirilgan boʻlib, loyihalar doirasida 500 dan ortiq olimalarimiz ilmiy izlanishlar olib borgan. Mazkor loyihalarning amalga oshirilishi natijasida kimyo, fizika-matematika, mexanika, biologiya, qishloq xoʻjaligi yoʻnalishlarida bir qator ilmiy yangiliklar yaratilgan.
Tadbir doirasida “Olima ayol – kelajak muhandisi” mavzusida panel muhokamasi boʻlib oʻtdi. Unda Yevropa Ittifoqining Oʻzbekistondagi elchisi Adrian Sharlotta, Birlashgan Millatlar Tashkilotining aholi fondi (UNFPA) doimiy vakili Nigina Abbaszade, biologiya fanlari doktori, professor Shahlo Turdikulova, Erasmus + Milliy Ofisi koordinatori Aziza Abdurahmonova, Toshkent davlat iqtisodiyot universiteti prorektori Gulnora Abdurahmonova ishtirok etdi. Panel muhokamada Markaziy Osiyodagi xotin-qizlarning jamiyatdagi oʻrni, bu boradagi oʻzgarishlar, ayol-qizlarning taʼlim olishi uchun yaratilgan imkoniyatlar kabi masalalarga toʻxtalib oʻtildi.
– Ilm-fan sohasida gender tengligiga erishish nafaqat ijtimoiy adolat masalasi, balki ilmiy mukammallik, innovatsiya va barqaror rivojlanishning strategik talabidir. Ayollarning ilm-fan sohasida ishtiroki va rivojlanishi uchun tizimli toʻsiqlarni bartaraf etish orqali biz hamma uchun yorqin kelajakni yaratamiz, – dedi Adrian Sharlotta.
Tadbir soʻngida ilmiy faoliyatga oid davlat dasturlari doirasida amaliy loyihalar tanlovi natijalariga koʻra moliyalashtirilgan Shahzoda Xudoynazarovaning “Xoreografiya sanʼati orqali imkoniyati cheklangan bolalarning jamiyatdagi faolligini oshirishga qaratilgan multimedia mahsulotini yaratish” loyihasi doirasida bolajonlarning musiqiy chiqishlari tashkil etildi.