Toshkent davlat texnika universitetida zamonaviy laboratoriya foydalanishga topshirildi
2024-04-01 15:50:00 / Vazirlik yangiliklari
Mazkur laboratoriya xonasi ilmiy-texnik dasturlar doirasidagi “Ishlab chiqarish korxonalarida programmalashtirilgan mantiqiy kontroller (PMK) asosida ishlaydigan oʻquv simulyatorini ishlab chiqish” mavzusidagi amaliy loyiha doirasida foydalanishga topshirildi.
Dastlab yig‘ilganlarga loyiha doirasida olib borilgan ilmiy tadqiqot ishlar taqdimot qilindi. Unda professor I.Rahmonov loyihaning birinchi yilda “Elektr taʼminoti asoslari” fanidan laboratoriya ishlarini bajarish va fan boʻyicha barcha mashgʻulotlarni oʻz ichiga olgan veb-sayt yaratilgani haqida maʼlumot berdi.
Loyihaning ikkinchi yilida “Elektr taʼminoti asoslari” fanidan laboratoriya ishlarini bajarish programmalashtirilgan mantiqiy kontroller asosida oʻquv simulyatori yaratildi. Shuningdek, “Elektr taʼminoti” kafedrasida laboratoriya xonasi tashkil etilib, u texnik va dasturiy vositalar bilan toʻliq jihozlandi.
Oʻquv simulyatori yordamida talabalar “Elektr taʼminoti asoslari” fanidan elektr shitining nosozligini aniqlash va uni bartaraf etish, elektr texnologik qurilmalarning ish rejimlari va sanoat korxonasining bosh pasaytiruvchi podstansiyasini tadqiq etish hamda laboratoriya ishlarini virtual reallikda bajarish imkoniyatiga ega boʻladilar. Bundan tashqari, uning yordamida laboratoriya ishlarini bajarish orqali talabalarga nazariy egallangan bilimlarni amaliy jihatdan mustahkamlash, elektr xavfsizligi nuqtayi nazaridan yuqori kuchlanishli obyektlar bilan tanishish va ulardagi jarayonlarni tahlil qilish imkonini beradi.
So‘ng tadbir ishtirokchilari laboratoriya xonasidagi yangi zamonaviy asbob-uskunalarning ishlash holati bilan tanishdilar.