O‘zbekiston Respublikasi Oliy taʼlim, fan va innovatsiyalar vazirligi

Ushbu forum innovatsiya va ilm-fan rivojiga hissa qo‘shish, yosh olimlar o‘rtasida fikr almashish va xalqaro ilmiy hamkorlikni kengaytirishga yo‘naltirilgan.

Tadbirni “Il-de-Frans” ijodiy uyi direktori Francesco Torinni ochib berdi. Oliy ta’lim, fan va innovatsiyalar vazirligining Yoshlar akademiyasi rahbari, yosh olimlar, startapchilar hamda Fransiya va O‘zbekistonning nufuzli ilmiy va ta’lim muassasalari vakillari ishtirok etdilar.

Tadbir davomida Yoshlar akademiyasi rahbari Akbarxon Sobirxonov O‘zbekistonda yosh olimlar va innovatorlar uchun yaratilgan imkoniyatlar haqida ma’lumot berdi. Toshkent to‘qimachilik va yengil sanoati instituti vakili esa yosh tadqiqotchilar uchun amaliy yo‘nalishlar bo‘yicha ma’ruza qildi.

Fransiyalik startapchilar o‘z tajribalari bilan o‘rtoqlashdi, shuningdek, “3 slayd – 3 minut” taqdimot dasturi doirasida yosh olimlarning innovatsion g‘oyalari namoyish etildi.

Shuningdek, Umumjahon yoshlar assotsiatsiyasi rahbari, Oliy ta’lim, fan va innovatsiyalar vazirligi Jamoatchilik kengashi a’zosi Otabek Shavkatov “Xorijdagi vatandoshlarga yaratilgan shart-sharoitlar” mavzusida ma’ruza qildi. Ishtirokchilar ilmiy hamkorlik, ikki davlat yosh olimlari o‘rtasidagi hamkorlikni rivojlantirish bo‘yicha savol-javob sessiyasida faol qatnashdilar.

Tadbir natijasida bir qator kelajak tashabbuslari belgilab olindi. Jumladan, Fransiyalik olimlarning O‘zbekistonda ilmiy seminarlar o‘tkazishi rejalashtirildi. 6 nafar yosh olim Yoshlar akademiyasi a’zoligiga qabul qilindi.

Shuningdek, “Techno Camp” yozgi ilmiy oromgohi tashkil etilib, Fransiyadan 10 nafar yosh olim O‘zbekistonga taklif qilinishi belgilandi.