O‘zbekiston Respublikasi Oliy taʼlim, fan va innovatsiyalar vazirligi

Bayram munosabati bilan Shohrux Daliyev mahalla ahliga samimiy tabriklar yoʻllab, ularning muammolarini muhokama qildi. Jumladan, yaqinda turmush oʻrtogʻidan ayrilgan, ikki qiz farzandi turmushga chiqqan yolgʻiz ayolning tibbiy muolajaga muhtojligi aniqlandi. Uning koʻz operatsiyasi Andijon tibbiyot instituti bilan hamkorlikda tashkil etilishi belgilandi. Shuningdek, uning uy hovlisi devor bilan oʻralishida amaliy yordam koʻrsatiladi.

Mahalladagi yana bir kam taʼminlangan oila tomorqasida limon yetishtiriladigan parnik mavjud boʻlib, u yerda qoʻshimcha bodring ekish uchun zarur yordam koʻrsatilishi maʼlum qilindi.

Shuningdek, vazirning birinchi oʻrinbosari yana bir muhtoj oila aʼzolari bilan uchrashdi. Unda yolgʻiz ayolning farzandi Toshkentdagi Pediatriya institutida davolanishi kerakligi, ammo tibbiy order olishda qiyinchilikka duch kelayotgani maʼlum boʻldi. Sh. Daliyev uning Pediatriya institutida davolanishi masalasini hal qilishda yordam berilishini va poytaxtga borish uchun yoʻl xarajatlari qoplab berilishini maʼlum qildi.

Tashrif davomida nogironligi boʻlgan er-xotinning turmush holati oʻrganildi. Mazkur oila farzandining boshida oʻsimta mavjud boʻlib, uning Toshkentda shifokorlar koʻrigidan oʻtishi uchun amaliy yordam koʻrsatilishi aytildi. Bundan tashqari, oilaning tomorqasiga ekin ekishda yordam berilishi rejalashtirildi.

Shuningdek, suv chiqarish skvajinasi va fermer xoʻjaligidagi quduqli nasos stansiyasining holati bilan tanishib, yer osti suv skvajinasi faoliyatini yaxshilash maqsadida quyosh batareyalari oʻrnatilishi rejalashtirildi. Issiqxonadagi quyosh panellari samaradorligi va energiya tejamkorligi masalalari boʻyicha fikr almashildi.

Prezidentimiz topshirigʻiga muvofiq, kam taʼminlangan oilalar farzandlarining iqtidorini aniqlash, ularni taʼlimga yoʻnaltirish va kelajakdagi imkoniyatlarini oshirishga katta eʼtibor qaratilmoqda. Shu munosabat bilan Shohrux Daliyev mahalla yettiligi va mahalliy aholi bilan uchrashib, ishsiz fuqarolarni kasb-hunarga oʻqitish masalalarini muhokama qildi. Andijondagi texnikumlarda maxsus qisqa muddatli kurslar tashkil etilib, ishsiz aholiga qiziqqan sohalari boʻyicha bepul taʼlim berish rejalashtirildi.