GWP Solutions kompaniyasi bilan kasbiy ta’lim sohasida hamkorlik istiqbollari muhokama qilindi
2024-09-19 21:00:00 / Vazirlik yangiliklari
Tomonlar O‘zbekiston Respublikasi uchun kasb-hunarga o‘qitish markazi modelini amalga oshirish bo‘yicha kompleks strategiyani ishlab chiqish masalasini muhokama qilishdi.
Uchrashuvda yoshlarning oliy ta’limga kirmasdan kasbiy ta’limga tayyorlash bo‘yicha fikr almashildi. Bunda har bir viloyat imkoniyatlaridan kelib chiqib mintaqaviy treninglarni rivojlantirish hamda kadrlarni tayyorlash masalasiga diqqat qaratildi.
Vazir Q.Sharipov kasbiy ta’lim masalasi mamlakatimiz uchun dolzarb masala ekanligini alohida qayd etib, “Webster university” bilan amalga oshirilishi rejalashtirilgan loyiha uchun Qoraqalpog‘iston Respublikasida kasb-hunarga o‘qitish markazining pilot loyihasini amalga oshirish taklifini ilgari surdi.
Professor Djon Payl o‘z o‘rnida ushbu taklifni qo‘llab-quvvatladi hamda tomonlar pilot loyiha dasturini ishlab chiqishga kelishib oldilar.