Latviya bilan ta’limni raqamlashtirish sohasidagi hamkorlik masalalari muhokama qilindi
2024-09-18 12:05:00 / Vazirlik yangiliklari
Delegatsiyaning "ICT Week Uzbekistan-2024" tadbirida ishtiroki alohida qayd etilib, Latviyadan tashrif buyurgan mehmonlarning ushbu muhim tadbirga qo‘shgan hissasi ta’lim va texnologiya sohasidagi hamkorligimizni mustahkamlashiga ishonch bildirildi.
– Ta’limni raqamlashtirish bugunning dolzarb masalalaridan bo‘lib, ta’limning zamonaviy shakllariga o‘tish juda muhim ekanligini yaxshi tushunamiz, – dedi K.Sharipov. – Vazirligimiz raqamli texnologiyalar taqdim etayotgan imkoniyatlardan nafaqat ta’lim jarayonlarini takomillashtirish, balki ilm-fan va innovatsiyalarni yoshlarga yanada qulayroq qilish uchun foydalanishga intiladi.
Gatis Ozols o‘z navbatida O‘zbekistonning raqamlashtirish borasidagi jadal qadamlarini yuqori baholadi va bu yo‘nalishda hamkorlikka tayyorligini bildirdi.
Xususan, Riga texnika universitetida o‘zbekistonlik tadqiqotchilar uchun doktoranturada tahsil olish, yangi ta’lim dasturlarini yaratishga xizmat qiladigan tajriba almashish, ta’limni raqamlashtirishda hamkorlik qilish masalalari muhokama qilindi.
Tomonlar Latviyaning bir nechta oliy ta’lim muassasalarini birlashtirgan holda raqamlashtirish bo‘yicha xizmat ko‘rsatish tajribasini O‘zbekiston oliy ta’lim muassasalari misolida amaliyotga tatbiq etish imkoniyatlarini o‘rganishga kelishdilar.
Uchrashuv so‘ngida tomonlar muloqot samarali bo‘lib, aniq natijalarga olib kelishiga ishonch bildirdilar.