Buxoroda “Kiberneftgaz” oliy muhandislik maktabi ochildi
2024-09-16 17:30:00 / Vazirlik yangiliklari
Xususan, vazir “Kiberneftgaz” oliy muhandislik maktabi ochilishida qatnashdi hamda “Face ID” tizimi, laboratoriya xonalari, Registrator ofisi va “Mashinasoz” texnoparki faoliyatini ko‘zdan kechirdi.
Qayd etilganidek, “Kiberneftgaz” oliy muhandislik maktabi “O‘zbekneftgaz” AJ hamkorligida tashkil etilgan bo‘lib, unda o‘quv xonalarda, mashg‘ulot qurilmalari, simulyatorlar, zamonaviy dasturlar, VR zonalar mavjud. Mazkur maktabda Davlatimiz rahbari ta’kidlaganidek yurtimizda mavjud bo‘lmagan muhandislik yo‘nalishlari - tannarx muhandisligi, qiyoslash muhandisligi, qayta muhandislik yo‘nalishlari o‘qitilib, ishlab chiqarishda muammoli vaziyatni hal etishga qodir kadrlarni tayyorlash maqsad qilingan.
Shuningdek, vazir Q.Sharipov institutning “Issiqlik texnikasi. Termodinamika” laboratoriyasini ko‘zdan kechirish jarayonida energoaudit bo‘yicha korxonalar bilan ishlash ishlariga e’tibor berish kerakligini ta’kidladi.
Ushbu o‘quv va ilmiy laboratoriya xonasida 2024-yil Islom taraqqiyoti banki mablag‘lari hisobidan 17 ta zamonaviy o‘quv laboratoriya jihozlari o‘rnatilgan bo‘lib, ularda 138 ta laboratoriya ishlarini bajarish imkoniyati yaratilgan.
Mas’ullar axborotiga ko‘ra, mazkur laboratoriya jihozlaridan foydalangan holda hozirda “Energiya samaradorligini nazorat va boshqarishning avtomatlashtirilgan dasturiy-axborot ta’minoti” mavzusidagi 400 mln so‘mlik “drayver” innovatsion loyiha, O‘zbekiston iqlimiy sharoitida samarador ishlovchi shamol energetik qurilmasini yaratish mavzusidagi 500 mln so‘mlik amaliy loyiha va “Sanoat korxonalarida energetik tekshiruvlar o‘tkazish” mavzusi bo‘yicha 1,8 mlrd so‘mlik xo‘jalik shartnomalari bajarilib kelinmoqda.
Shundan so‘ng, vazir Qo‘ng‘irotboy Sharipov “Mashinasoz” texnoparki bilan tanishib chiqdi. Texnoparkda Islom taraqqiyoti banki mablag‘lari hisobidan 10 dona RDBli universal tokarlik, RDBli frezalash-yo‘nish dastgohlari, universal frezalash, tokarlik-vintqirqar, lazerli metall kesish, aylana jilvirlash, vertikal-parmalash, parmalash-frezalash dastgohlari, tish frezalash yarim avtomati keltirildi.
Ushbu texnoparkda o‘quv mashg‘ulotlarini o‘tkazish bilan bir qatorda, professor-o‘qituvchilar, ilmiy izlanuvchilar, doktorantlar va talabalar tomonidan ilmiy-tadqiqot ishlarini o‘tkazish uchun barcha sharoitlar yaratilgani alohida qayd etildi.