Xizmat safari bilan Buxoroga borgan vazir o‘rinbosari talabalar turar joyida qoldi
2024-09-13 18:00:00 / Vazirlik yangiliklari
Dastlab, 12-sentyabr kuni Buxoro muhandislik-texnologiya institutidagi “Mashinasozlik texnoparki” va talabalar turar joyida talabalarga yaratilgan sharoitlar hamda oliy muhandislik maktabi bilan tanishdi. Institut jamoasi bilan o‘tkazilgan yig‘ilishda ta’lim sifatini ta’minlash, raqamlashtirish sohasiga alohida e’tibor berish, xalqaro darajadagi amaliy loyihalarni ko‘paytirish, ilmiy-innovatsion ishlanmalarni tijoratlashtirish bo‘yicha istiqbolli rejalar yuzasidan fikr almashildi. Uchrashuv so‘nggida muassasada ta’lim, ilm-fan va innovatsion faoliyatni samarali yo‘lga qo‘ygani uchun institut rektori Sadoqat Siddiqovaga Oliy ta’lim, fan va innovatsiyalar vaziri Qo‘ng‘irotboy Sharipovning Faxriy yorlig‘i topshirildi.
Keyingi manzil Buxoro davlat universiteti bo‘lib, yangi 2024/2025-o‘quv yili boshlanganligi munosabati bilan talabalar turar joyida istiqomat qilayotgan talaba-yoshlar bilan suhbat o‘tkazildi. Shuningdek, yotoqxonadagi shart-sharoitlar, jumladan oshxona, ma’naviyat xonalari faoliyatini ko‘zdan kechirildi. Shu kuni yoshlar bilan hamnafas vazir o‘rinbosari talabalar turar joyida tunab qoldi.
Dasturga muvofiq 13-sentyabr kuni O.Mahkamov Buxoro tabiiy resurslarni boshqarish institutida bo‘ldi. Institutda yangi o‘quv yili boshlanishi, talabalarni bo‘sh vaqtini mazmunli o‘tkazish hamda ilmiy izlanishlari uchun yaratilgan sharoitlar hamda futzal bo‘yicha jahon chempionati o‘yinlari o‘tkaziladigan sport zal imkoniyatlarini ko‘zdan kechirdi.
Shundan so‘ng, vazir o‘rinbosari Buxoro turizm va madaniy meros texnikumida bo‘lib, o‘quv amaliyot xonalari, Axborot-resurs markazi hamda o‘quv jarayoni bilan tanishdi.
Mas’ullarga ta’lim jarayoni bilan bog‘liq kamchiliklarni bartaraf etish, xorijiy tajribalar asosida dual ta’limni joriy qilish hamda turizm sohasida kadrlarni tayyorlash bo‘yicha tegishli topshiriqlar berildi.
Buxoro davlat pedagogika instituti Harbiy ta’lim fakultetidagi o‘rganishlarda fakultet professor-o‘qituvchilarining ilmiy salohiyati, sifatli ta’lim uchun yaratilgan shart-sharoitlar bilan tanishildi.
Vazir o‘rinbosari fakultet talaba-kursantlari bilan o‘tkazgan uchrashuvda ularni yangi o‘quv yili boshlangani bilan tabriklab, mamlakatimiz tinchligi va osoyishtaligini ta’minlash, yosh avlodni vatanparvarlik ruhida tarbiyalashda ularning o‘rni muhimligini ta’kidladi.
Yaratib berilayotgan keng imkoniyatlardan unumli foydalanib, Vatanimiz ravnaqi yo‘lida yanada ko‘proq xizmat qilish haqida qizg‘in suhbat o‘tkazildi.
Shuningdek, harbiy vatanparvarlik bo‘yicha fakultet talabalarining chiqishlari namoyish etildi.
Kunning ikkinchi yarmida Buxoro davlat universitetining faollar yig‘ingohida Oliy ta’lim, fan va innovatsiyalar vaziri o‘rinbosari Otabek Mahkamov hamda viloyatdagi oliy ta’lim muassasalari tayanch doktorantlari va mustaqil izlanuvchilari bilan uchrashuv tashkil etildi.
Ochiq muloqot tarzida o‘tgan uchrashuvda yosh olimlar bilan mamlakatimizda ilm-fan va tarmoq integratsiyasini jadallashtirish borasida amalga oshirilayotgan islohotlar, bu yo‘nalishda yechimini kutib turgan masalalar muhokama qilindi. Berilgan savol va takliflar yechimi yuzasidan fikr almashildi hamda qator masalalarni o‘z o‘rnida hal qilinishiga erishildi.