Oliy ta’lim, fan va innovatsiyalar vazirligining murojaatlar platformasi orqali “o‘qishni ko‘chirish” bo‘yicha fuqarolardan eng ko‘p berilayotgan savollarga javoblarni e’tiboringizga havola etamiz.
2024-07-16 14:05:00 / Vazirlik yangiliklari
1. O‘qishimni viloyatimga ko‘chirayotgan edim. Qaysi elektron tizim orqali o‘qishni ko‘chirish uchun ariza bersam bo‘ladi?
Respublika oliy ta’lim muassasalariga talabalar o‘qishini ko‘chirish, qayta tiklash bo‘yicha arizalar ikkita elektron tizim orqali qabul qilinadi. Agar respublikamizning bir davlat oliy ta’lim muassasasidan boshqasiga yoki bir oliy ta’lim muassasasi doirasida o‘qishni ko‘chirishni rejalashtirayotgan bo‘lsangiz, arizani transfer.edu.uz tizimiga yuklaysiz.
Agar xorijiy va nodavlat oliy ta’lim muassasalaridan davlat oliy ta’lim muassasalariga o‘qishni ko‘chirish istagida bo‘lsangiz, my.uzbmb.uz sayti orqali ariza topshiriladi
2. O‘qishni ko‘chirish uchun qanday hujjatlar tayyorlashim kerak?
O‘qishni ko‘chirish turiga qarab quyidagi hujjatlar ilova qilinishi kerak bo‘ladi.
Agar transfer.edu.uz sayti orqali ariza topshirayotgan bo‘lsangiz, transkript reyting daftarchasi yoki akademik ma’lumotnoma (JPG yoki PDF shakli) va ikkita uzrli sababdan birini asoslovchi hujjat.
my.uzbmb.uz sayti orqali murojaat qilinganda, transkript reyting daftarchasi yoki akademik ma’lumotnoma (JPG yoki PDF shakli) taqdim etiladi.
Alohida ta’kidlash lozimki, so‘nggi yillarda oliy ta’limdagi raqamlashtirish natijasida onlayn hujjat topshirish platformalarida shaxsni tasdiqlovchi hujjat talab etilmaydi. Barcha ma’lumotlar OneID tizimi orqali avtomatlashgan holda shakllanadi.
3. Yaqinda turmush qurganman, turmush o‘rtog‘im viloyatda yashaydi. Shu sababli o‘qishimni viloyatimga ko‘chirsam bo‘ladimi?
Davlat oliy ta’lim muassasasining biridan boshqasiga talabalar o‘qishini ko‘chirishga faqatgina ikki holatda ruxsat beriladi.
Birinchisi, bu talaba oila qurishi munosabati bilan turmush o‘rtog‘i doimiy yashaydigan hududdagi oliy ta’lim muassasasiga o‘qishini ko‘chirish uchun murojaat qilganda.
Ikkinchisi, esa davlat organlarining xodimlari ish joyi o‘zgargan taqdirda uning turmush o‘rtog‘i yoki voyaga yetmagan farzandi o‘qishini ko‘chirish uchun murojaat qilganda. Bunda tegishli vazirlik yoki idora rahbarining tavsiyasi talab etiladi.
Demak, bir viloyatdan ikkinchisiga ko‘chirishning 2 ta uzrli sabablaridan biri sizga mos keladi. Shu bois siz turmush o‘rtog‘ingiz doimiy yashaydigan hududdagi oliy ta’lim muassasasiga ko‘chirish uchun belgilangan muddatlarda murojaat qilishingiz mumkin.
4. 2-yildan beri Qozog‘istonda tahsil olaman. O‘qishimni O‘zbekistonga ko‘chirsam bo‘ladimi?
Amaldagi tartibga muvofiq, xorijiy mamlakatlarda faoliyat yuritayotgan oliy ta’lim tashkilotlaridan davlat oliy ta’lim muassasalariga talabalar o‘qishni ko‘chirish uchun faqat mos va turdosh ta’lim yo‘nalishlariga hujjat topshiradi hamda maxsus sinov imtihonida ishtirok etib, o‘tish balini to‘plash talab etiladi. Bunda
1) talabadan alohida iqtidor talab etiladigan ta’lim yo‘nalishlari bo‘yicha kasbiy (ijodiy) imtihonlar, boshqa ta’lim yo‘nalishlari bo‘yicha test sinovlari o‘tkaziladi.
2) test sinovlari va kasbiy (ijodiy) imtihonlar bo‘yicha o‘tish ballari har yili 15-iyulga qadar tizimida oliy ta’lim muassasalari bo‘lgan vazirlik va idoralar tomonidan belgilanib, Bilim va malakalarni baholash agentligining rasmiy veb-saytida e’lon qilinadi;
3) o‘tish balidan past ball to‘plagan talabalar bakalavriatga qabul qilishdagi tartibga muvofiq tabaqalashtirilgan to‘lov-kontrakt asosida o‘qishga qabul qilinadi;
4) xorijdan mos va turdosh bo‘lmagan yo‘nalishga o‘qishni ko‘chirishga ruxsat berilmaydi.
5.Grantda o‘qiyman o‘qishni ko‘chirganimdan keyin "kontrakt" bo‘lib ko‘chmaymanmi?
O‘qishning barcha shakllari bo‘yicha oliy ta’limning mos va turdosh yo‘nalishlari hamda mos mutaxassisliklari bo‘yicha davlat grantlari o‘rinlariga ko‘chirishga faqat davlat grantlari asosida tahsil olgan talabalar arizasiga ko‘ra oliy ta’lim muassasalarida tegishli o‘quv yilidagi qabul qilish kvotalarida belgilangan davlat grantlarining soni doirasida ruxsat etiladi.
Ya’ni, agar OTM yo‘nalishlari uchun ajratilgan bo‘sh grant o‘rni bo‘lsa, ta’lim muassasasidagi vaziyatdan kelib chiqib, talabaga grant asosida o‘qishni ko‘chirishga ruxsat berilishi mumkin.
Ko‘zi ojiz va nogironligi bor talabalarga grant asosida o‘qishni ko‘chirishga ruxsat beriladi.
6. Talaba xorijiy tillar fakulteti xorijiy til va adabiyoti (ingliz) yo‘nalishida 1-kursni tamomladi. Shu yo‘nalishda sirtqi ta’lim mavjud bo‘lmagani sababli u o‘qishini boshqa universitetning ingliz filologiyasi yoki tarjima nazariyasi yo‘nalishining sirtqi ta’limiga ko‘chirmoqchi. Buning imkoni bormi?
Buning imkoni yo‘q, boisi talabada davlat oliy ta’lim muassasasining biridan boshqasiga talabalar o‘qishini ko‘chirish uchun asos bo‘ladigan ikkita uzrli sababdan biri bo‘lishi kerak. Bu murojaatchida keltirilmagan. Bundan tashqari, filologiya yo‘nalishlarida sirtqi ta’lim mavjud emas.
7. Qachondan boshlab ta’lim shaklini sirtqiga ko‘chirish uchun ariza topshirsa bo‘ladi? Arizani onlayn topshirsa bo‘ladimi?
Ta’lim shaklini o‘zgartirish yuzasidan murojaatlar transfer.edu.uz sayti orqali 15-iyuldan 5-avgust kuniga qadar onlayn qabul qilinadi. Bunda talaba tahsil olayotgan yo‘nalish bo‘yicha OTM ichki imkoniyati va sirtqi ta’lim shakli mavjud bo‘lganda uning arizasi qanoatlantirilishi mumkin.
Hurmatli yurtdoshlar, so‘nggi kunlarda ushbu mavzuga doir so‘ralgan eng ko‘p savollarga javoblar shulardan iborat edi. Sizda ham oliy va professional ta’lim sahosiga doir savollar bo‘lsa, vazirlikning @eduuzuniversalbot’i orqali yoki vazirlik Murojaatlar markazining +998712306464 telefon raqamiga murojaat qilishingiz mumkin.