O‘zbekiston Respublikasi Oliy taʼlim, fan va innovatsiyalar vazirligi

Taʼkidlash lozimki, 2023-yilga qadar umumiy oʻrta, oʻrta maxsus, professional va maktabdan tashqari taʼlim tashkilotlari pedagog kadrlari attestatsiyasi Taʼlim sifatini nazorat qilish davlat inspeksiyasi tomonidan amalga oshirib kelingan. Vazirlar Mahkamasining 2023-yil 29-dekabrdagi 692-son qaroriga koʻra, umumtaʼlim maktablar pedagog kadrlarni attestatsiyadan oʻtkazish Maktabgacha taʼlim va maktab vazirligi tomonidan oʻrta maxsus (akademik litsey) va professional taʼlim muassasalari pedagog kadrlarni attestatsiyadan oʻtkazish Oliy taʼlim, fan va innovatsiyalar vazirligi tomonidan amalga oshirilishi belgilangan.

Test sinovlari pedagog kadrlarga qulaylik yaratish maqsadida har bir hududda bittadan oliy taʼlim muassasasida tashkil etilmoqda. Bunda imtihonlar mazkur oliy taʼlim muassasalarining kompyuter xonalarida onlayn tarzda amalga oshiriladi.

Kompyuter xonasidagi barcha kompyuterlar markazlashgan holda vazirlikning shifrlangan tizimiga ulangan boʻlib, test jarayonlari toʻliq vazirlik tomonidan nazorat qilinadi.

Hududlar kesimida test sinovlari kuyidagi OTMlarda boʻlib oʻtadi:
Qoraqalpoq davlat universiteti;
Andijon davlat tibbiyot  instituti;
Buxoro muhandislik-texnologiya instituti;
Jizzax politexnika instituti;
Qarshi muhandislik-iqtisodiyot instituti;
Navoiy davlat pedagogika instituti;
Namangan davlat pedagogika instituti;
Samarqand iqtisodiyot va servis instituti;
Guliston davlat universiteti;
Termiz davlat universiteti;
Toshkent davlat pedagogika universiteti;
Fargʻona politexnika instituti;
Urganch davlat universiteti;
Oʻzbekiston davlat jahon tillari universiteti.

Shuningdek, test sinovlari mobaynida zarur boʻladigan vositalarni xarid qilish uchun hududiy boshqarmalarning byudjetdan tashqari hisob-varaqalariga vazirlik tomonidan tegishli mablagʻlar oʻtkazib berish choralari koʻrilgan. 

Har bir hududdagi test sinovlari ikki smenada soat 10:00 da va 14:00 da boshlanadi. Har bir smenada 15 nafardan 100 nafargacha pedagoglar imtihondan oʻtkazilishi koʻzda tutilgan. Test sinovlari bo‘lib oʻtadigan obyektlar va test sinovlari vaqti haqida maʼlumotlar pedagog.edu.uz saytidan ham bilib olish mumkin. 

Shu oʻrinda, pedagoglar test sinovlari oʻtkaziladigan oliy taʼlim muassasalariga kamida test boshlanish vaqtidan kamida 1 soat oldin yetib kelishlari va nazorat roʻyxatidan oʻtishlari lozimligini eslatib o‘tamiz. Hozirda test sinovlari oʻtkaziladigan obyektlar va boshlanish vaqtlari toʻgʻrisida har bir test topshiruvchining platformada qoldirgan telefon raqamiga SMS xabarnoma yuborilmoqda.