O‘zbekiston Respublikasi Oliy taʼlim, fan va innovatsiyalar vazirligi

Forum nufuzli xalqaro reyting tashkiloti “Times Higher Education” tomonidan hamkor tashkilotlar bilan birgalikda o‘tkazildi. Unda 55 ta davlatdan 150 dan ortiq universitet va 60 dan ziyod xalqaro tashkilot delegatsiyalari ishtirok etdi. Anjuman dasturi doirasida universitetlarning xalqaro reytingdagi o‘rnini yaxshilash, reyting uchun masʼul va boshqa xodimlar malakasini oshirish, talabalar va professor-o‘qituvchilar almashinuvini yo‘lga qo‘yish, xalqaro hamkorlikni rivojlantirish mavzulari bo‘yicha seminarlar tashkil etildi.

Anjuman doirasidagi ikki tomonlama muloqotlar chog‘ida O‘zbekistonda oliy taʼlim tizimida olib borilayotgan islohotlar va erishilayotgan ijobiy natijalar to‘g‘risida batafsil maʼlumot berildi. Shuningdek, muzokaralar davomida O‘zbekiston oliy taʼlim muassasalarining xalqaro reytinglardagi o‘rnini yaxshilash, dunyoning eng nufuzli oliy taʼlim tashkilotlari bilan hamkorlik aloqalarini o‘rnatish, reyting tashkilotlari bilan hamkorlikni yanada jadallashtirish masalalari muhokama qilindi.

Tadbir doirasida “Times Higher Education” xalqaro reyting tashkilotining Maʼlumotlar bilan ishlash bo‘yicha ijrochi direktori Devid Uotkins bilan uchrashuv bo‘lib o‘tdi.

Suhbat davomida Oliy taʼlim, fan va innovatsiyalar vazirligi bilan “Times Higher Education” tashkiloti o‘rtasidagi hamkorlikning joriy holati, respublika oliy taʼlim muassasalarini xalqaro reytinglardagi o‘rnini yaxshilash, global reytinglarda ishtirok etishning ahamiyati va istiqbolli rejalar xususida fikr almashildi.

Uchrashuv yakunida, O‘zbekiston oliy taʼlim muassasalarining xalqaro reytinglar uchun masʼul xodimlari uchun seminarlar tashkil etish va “Times Higher Education” reyting tashkiloti tomonidan o‘tkaziladigan navbatdagi xalqaro tadbirlarni mamlakatimizda o‘tkazish bo‘yicha dastlabki kelishuvga erishildi.