2024/2025-o‘quv yili uchun 332 ta kasb-hunar maktablariga mahalliy hokimliklar tomonidan hududlarning ijtimoiy-iqtisodiy rivojlanish dasturlari asosida mahalliy mehnat bozori ehtiyojlari hamda ish beruvchilarning buyurtmalaridan kelib chiqib bergan takliflari asosida 112 ta kasb va mutaxassisliklar bo‘yicha 120 mingdan ortiq 9-sinf bitiruvchilarini qabul qilish rejalashtirilmoqda.

Shundan, kunduzgi ta’lim shakli bo‘yicha 110 mingta hamda dual ta’lim shakli bo‘yicha 14 mingta qabul rejasi ko‘zda tutilgan.

Xususan, qabul parametrlarida mehnat bozorining muhandislik ishi, ishlab chiqarish va ishlov berish, axborot-kommunikatsiya texnologiyalari, qishloq xo‘jaligi, xizmat ko‘rsatish, arxitektura va qurilish kabi sohalari bo‘yicha o‘rta bo‘g‘in kadrlarga bo‘lgan ehtiyojlar inobatga olingan.

Kasb-hunar maktablariga 9-sinf bitiruvchilarining hujjatlarini qabul qilish jarayoni har yili 1 iyuldan 20 iyulga (shu kuni ham) qadar kasb.edu.uz elektron platformasi qabul qilinadi.

O‘quvchilar belgilangan tartibda kirish imtihonlari orqali saralanib, davlat byudjeti asosida o‘qitiladi.

Kollej va texnikumlarga 2024/2025 o‘quv yili uchun vazirlik va idoralar hamda biriktirilgan oliy ta’lim muassasalarining takliflari asosida jami 110 mingdan ortiq qabul rejasini belgilash rejalashtirilgan.

Kasb va mutaxassislik egallash istagida bo‘lgan yoshlarni qo‘llab-quvvatlash maqsadida 45 mingdan ortiq o‘rin davlat granti asosida ajratiladi.

Davlatimiz rahbari tomonidan joriy yilning 5 fevral kuni ijtimoiy sohadagi ustuvor vazifalar muhokamasi yuzasidan o‘tkazilgan videoselektor yig‘ilishida professional ta’lim tizimida o‘rta bo‘g‘in kadrlarini tayyorlashni tizimli yo‘lga qo‘yish, ulardagi quvvatlarni 100 foizga ishlatish hamda dual ta’lim bilan qamrovni 50 ming nafarga yetkazish bo‘yicha kelgusidagi vazifalar belgilab berildi.

Qayd etish joizki, bugungi kunda 234 ta professional ta’lim muassasasida 15 ming nafar o‘quvchini dual ta’lim shakli bo‘yicha o‘qitish yo‘lga qo‘yilgan. Professional ta’lim muassasalari hamda korxona (tashkilot)lar o‘rtasida esa, 3 603 ta shartnoma imzolangan bo‘lib, ular tomonidan jami 3 144 nafar mutaxassis "Ustoz" sifatida biriktirilgan.

Ish beruvchilar bilan hamkorlikda dual ta’lim qamrovini oshirish maqsadida Buxoro, Andijon va Farg‘ona viloyatlarida  "Dual ta’lim – ishlab chiqarish va ta’lim o‘rtasidagi muvozanat" mavzusida forumlar tashkil etildi. Mazkur Forumlarda 250 dan ortiq ish beruvchi korxona va tashkilotlar ishtirok etib, ular bilan 3000 nafar o‘quvchini dual ta’lim shaklida o‘qishga qabul qilishga kelishib olindi.

Shuningdek, Vazirlikning hududiy boshqarmalari va 6 726 ta mahalladagi hokim yordamchilari va yoshlar yetakchisi bilan hamkorlikda ishsiz fuqarolarni kollej va texnikumlarga dual ta’lim shaklida o‘qishga jalb qilish maqsadida 2024 yilning aprel-iyun oylari uchun targ‘ibot va tashviqot ishlari reja-grafigi shakllantirildi. Tadbirlar davomida 1 953 ta mahalladagi hokim yordamchilari va yoshlar yetakchisi bilan hamkorlikda 15 ming nafar ishsiz fuqarolarni kollej va texnikumlarga dual ta’lim shaklida o‘qishga jalb qilish bo‘yicha ishlar amalga oshirilmoqda.

Yoshlarni kasb egallashga bo‘lgan qiziqishini oshirish va ularni iqtidorini ro‘yobga chiqarish maqsadida umumta’lim maktablarida "Kasb va yoshlar" tadbirlari o‘tkazilib, 7 mingga yaqin umumiy o‘rta ta’lim maktablarining 500 ming nafardan ortiq 7-11-sinf o‘quvchilari qamrab olindi.