O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi

Bu haqda O‘zbekiston Respublikasi Vazirlar Mahkamasining 2025-yil 10-martda qabul qilingan "Davlat qo‘riqxonalari va milliy tabiat bog‘i hududlarini kengaytirish bo‘yicha qo‘shimcha chora-tadbirlar to‘g‘risida"gi 153-sonli Qarorida belgilab qo‘yildi.

Qarorga ko‘ra, "Nurota" davlat qo‘riqxonasi hududi Forish tumanidagi zaxira yerlardan 1173,1 gektar, Forish davlat o‘rmon xo‘jaligining 270 gektar, Veterinariya va chorvachilikni rivojlantirish qo‘mitasining Samarqand viloyati Qo‘shrabot tumani Pangat hududidagi 1657,41 gektar va Payariq tumanining Xalqobod hududidagi 1165,46 gektar yer maydonlari hisobidan 4265,97 gektarga kengaytirilib, umumiy yer maydoni 22 017,97 gektarga yetkazildi. 

Shuningdek, "Zarafshon" milliy tabiat bog‘i hududi Bulung‘ur tumanidagi zaxira yerlardan 275,58 gektar va Jomboy davlat o‘rmon xo‘jaligining 42,34 gektar, Urgut ixtisoslashtirilgan davlat o‘rmon xo‘jaligining 278,78 gektar, Toyloq tumanidagi Darg‘om davlat o‘rmon ishlab chiqarish korxonasining 262,1 gektar, Toyloq tumanidagi zaxira yerlardan 1808,79 gektar va Jomboy tumanidagi zaxira yerlardan 140,02 gektar yer maydonlari hisobidan 2 807,61 gektarga kengaytirilib, umumiy yer maydoni 5 234,01 gektarga yetkazildi. 

Bundan tashqari, Surxondaryo viloyati Sherobod tumanidagi Qiziriq davlat o‘rmon xo‘jaligining 249 gektar yer maydonlari hisobidan "Surxon" davlat qo‘riqxonasi hududi kengaytirilib, umumiy yer maydoni 24 051 gektarga yetkazildi.

Bundan tashqari, "Nurota" va Surxon davlat qo‘riqxonalarining asosiy maydoniga tutash 17 145,2 gektar va 16 446 gektar yer maydonlari qo‘riqlanma zonalar etib belgilandi.

Mazkur qaror muhofaza etiladigan tabiiy hududlar maydonini kengaytirish orqali mavjud noyob turdagi o‘simlik va hayvonlarni muhofaza qilish samaradorligini oshirishga xizmat qiladi.

Ma'lumot uchun, so‘nggi yillarda ekologik tizimni yaxshilash va bioxilmaxillikni saqlash maqsadida amalga oshirilgan ishlar natijasida muhofaza etiladigan tabiiy hududlar yer maydoni respublika umumiy maydonining 14,2 foizdan ortiqrog‘ini tashkil etmoqda.

Eslatib o‘tamiz, avvalroq ikkita davlat qo‘riqxonasining 61 359,89 gektar yer maydonidan iborat qo‘riqlanma zonalari belgilangan edi.