Bugungi kunda pochta aloqasi nafaqat an’anaviy xat va jo‘natmalarni yetkazib berish, balki dunyo bo‘ylab insonlarni bog‘lab turgan muhim aloqa vositalaridan biriga aylangan. Elektron tijoratning rivojlanishi, onlayn xizmatlar va zamonaviy texnologiyalar davrida pochta xizmati o‘zining dolzarbligini saqlab qolgan va kundalik hayotimizda yanada keng qo‘llanilmoqda.

Pochta tizimi nafaqat jo‘natmalar yetkazish, balki raqamli taraqqiyotning ajralmas qismi sifatida, jahon bilan hamnafas bo‘lishda katta rol o‘ynamoqda. Sizlarning mehnatingiz tufayli O‘zbekistonning raqamli infratuzilmasi yanada rivojlanib bormoqda. 

Sizning fidokorona mehnatingiz orqali millionlab odamlar o‘z yaqinlariga xatlar, sovg‘alar yetkazib, korxonalar esa yangi imkoniyatlar yaratmoqda. Pochta tizimi nafaqat xizmat, balki ishonch va o‘zaro muloqot ramzi hisoblanadi.

“O‘zbekiston pochtasi” AJ bugungi kunda nafaqat milliy, balki xalqaro miqyosda ham eng muhim pochta xizmatlarini amalga oshirmoqda. Jamiyatning 7,5 ming nafardan ziyod xodimi, 14 ta hududiy va 4 ta ixtisoslashtirilgan filiallari, 161 ta bog‘lamasi hamda 1 603 ta aloqa bo‘limlari orqali xalqimizga xizmat ko‘rsatish va O‘zbekistonning eng chekka hududlariga ham axborot almashinuvi va jo‘natmalar yetkazilishini ta’minlab kelayotganingiz tahsinga sazovordir.

Shu muborak kunda barchangizga mustahkam sog‘lik, omad va farovonlik tilaymiz. Yangi g‘oyalaringiz va tashabbuslaringiz doimo muvaffaqiyat bilan yuksalsin!

Butunjahon pochta kuni muborak bo'lsin!