Vobkent: 38-sonli umumta’lim maktabi bog‘-tomorqasi ham havas qilgulik...
2024-09-21 12:05:00 / Yangiliklar
Hudud muhandislik-kommunikatsiya tarmoqlarida ta’mirlash-tiklash ishlari olib borilib, aholi va ular farzandlariga qulay imkoniyat yaratilgan. Jumladan, hududdagi 18-sonli maktabgacha ta’lim tashkiloti 1,6 milliard so‘m mablag‘ evaziga qayta ta’mirdan chiqarilgan bo‘lsa, bugunga kelib 38-sonli umumta’lim maktabini zamonaviy qiyofaga keltirish uchun ta’mirlash ishlari olib borilmoqda.
“Shohnigor” oilaviy poliklinikasi ta’miriga 550 million so‘m mablag‘ ajratilib, yig‘ilib qolgan muammolarni hal qilish, ahvolni o‘nglash chora-tadbiri ko‘rilgan. Hududdagi 18 kilometr masofaga vodoprovod quvuri tortilib, umumiy qiymati 4,4 milliard so‘m mablag‘ evaziga gidroinshoot qurilishi ham nihoyasiga yetkazilgan. Ichki yo‘lning 4,5 kilometr qismi qayta ta’mirlangan bo‘lsa, shundan yarmi asfaltlashtirilgan. Qariyb 6 kilometr masofadagi elektr energiyasi liniyasi va o‘nlab simyog‘ochlar beton tayanch ustuniga yangilanib, 2 ta yangi transformator punkti o‘rnatilgan.
Ayni kunda 296 nafarga yaqin o‘quvchini o‘z bag‘riga olgan 38-sonli umumta’lim maktabi o‘qituvchi va o‘quvchilari nainki zamonaviy usulda jihozlangan fan kabinetlari, o‘quv-laboratoriya va sinfxonalari bilan faxrlanadi, balki ko‘rganda ko‘zni quvontiradigan maktab bog‘ini ham astoydil parvarishlashni odat qilishgan.
Maktabning yordamchi xo‘jaligiga aylangan tomorqasi 50 sotixdan ortiq maydonni egallagan bo‘lib, hozirda mo‘jazgina 3 sotix maydonida loviya, 3 sotix maydonida oshqovoq, 8 sotix maydonida baqlajon, 1 sotix yerida qalampir, 3 sotix maydonida makkajo‘xori, yana bir qismida esa gullar ekib yetishtirilmoqda. Bir tomonda esa tokzor barpo qilingan bo‘lib, unda har yili xushxo‘r uzumning bir necha xilidan yetishtirib kelinadi.
Xuddi shunday, maktab atrofidagi yerda o‘rik, olma, gilos, shaftoli, behi, qaroli kabi mevali daraxtlardan ham har yili pishiqchilik mavsumida shiraga to‘lgan hosil olinayotgani maktab va o‘quvchilar manfaatiga xizmat qilmoqda. Shu kunlarda maktab tomorqachi mirishkorlari ekin yerining har qarichini bo‘sh qoldirmasdan 2 sotix maydonda kartoshka yetishtirmoqdalar.
Umuman, Shohnigordagi ta’lim dargohi yordamchi xo‘jaligi — bog‘-tokzori va tomorqa yerida yetishtirilayotgan meva-sabzavot hosilidan har yili qo‘lga kiritilayotgan daromad hisobidan kutubxona uchun moddiy-texnik jihozlari va kitoblar bilan birgalikda kitobxonlik tanlovlari sovrindorlari uchun esdalik sovg‘alari, velosipedlar xarid qilinmoqda. Yaqinda xuddi shunday tartibda 10 million so‘m o‘qituvchilar xonasi uchun jihozlar va musiqa asboblari sotib olingani ham barkamol avlod ta’lim-tarbiyasiga e’tibor namunasi, albatta.
Viloyat hokimligi matbuot xizmati