Olot: "Qumkashon" hamda “Xalifa”da qurilgan ko‘priklar yo‘lovchilar uzog‘ini yaqin qiladi
2024-09-20 18:10:00 / Yangiliklar
Muhimi, bugunga kelib shu kabi abgor ahvoldagi qator ko‘priklar qayta ta’mirlanib, manzili sari oshiqqan yurtdoshlarimiz uchun qulay shart-sharoit hozirlanmoqda.
Tumanning olis "Qumkashon" mahalla fuqarolar yig‘ini aholisi ham keyingi yillarda buzuq va nosoz ko‘prik tufayli tashvishga tushib qolishgan, ko‘p yildirki, hududdan o‘tgan zovur ustidagi ko‘prik allaqachon yaroqsiz va omonat ko‘rinishga kelgandi.
Nihoyat, joriy yilda Qumkashon mahallasidan o‘tuvchi “4K-202” rusumli, "Eshakchi q.–Baxrombayot q" avtomobil yo‘lining 13,4 kilometr qismidagi hamda Xalifa mahallasining “Amu-Qorako‘l” kanali ustidan "Shayx Adiz bobo" qabristoniga o‘tuvchi piyodalar osma ko‘prigi ta’mirlanib, aholini qiynab kelgan muammo o‘z yechimini topmoqda.
Hududdagi Xalifa, Arabxona, Soloqorovul hamda Jayxunobod mahallalarini bog‘lovchi ko‘prik Buxoro muntazam yo‘llardan foydalanish davlat korxonasi tomonidan qayta ta’mirlanmoqda. Bu ko‘prik qayta qurilishiga 10 dan ortiq maxsus texnika va 20 ga yaqin ishchi-mutaxassis jalb qilingani ish ko‘lamidan dalolat, albatta.
— Asosiysi, yangi va mustahkam ko‘priklar 10 mingdan ortiq aholi talab va istaklaridan kelib chiqqan holda, har biri qiymati 3 milliard so‘m atrofidagi mablag‘ evaziga zamonaviy ko‘rinishda qurilmoqda, — deydi tuman yo‘llardan foydalanish davlat korxonasi direktori Dostonjon Karimov. — Yangi ko‘priklar aholiga qulaylik yaratishi bilan birga, avtomobil qatnovi masofasining qisqarishi hisobiga ma’lum vaqt va mablag‘ni tejash imkonini beradi. Muhimi, endi bu ko‘priklardan mahalla ahli emin-erkin va ortiqcha xavotirsiz o‘z manzillari sari qatnashlari mumkin bo‘ladi. Zero, odamlar uzog‘ini yaqin, mushkulini oson qilishdan xayrli va savob ish bormi dunyoda?!
Viloyat hokimligi matbuot xizmati