Sahat Yodgorov: “Mehnatkash odam hech qachon kambag‘al bo‘lmaydi”
2024-09-19 12:15:00 / Yangiliklar
Shundan 9 ta novvoyxona, 6 ta milliy shirinliklar tayyorlash sexi, “AKFA” eshik va deraza romlarini ishlab chiqarish sexlari, yana boshqa turdagi ishlab chiqarish sexlari faoliyati yo‘lga qo‘yilgan. Qolaversa, hududda yuz gektarga yaqin aholi tomorqasidan unumli foydalanib kelinayotgani aholi dasturxoni to‘kinligini ta’minlash barobarida ehtiyojmand oilalar uchun daromad manbai bo‘lib xizmat qilmoqda. Bejizga joriy yil boshida “Ma’rifat” mahalla fuqarolar yig‘ini raisi Dilbar Atamurodova tumanda “Eng namunali mahalla” ko‘rik-tanlovida g‘oliblikni qo‘lga kiritmagan.
Olis tumandagi “Ma’rifat” mahallasida mehnatkash oilalardan biri Yodgorovlar xonadoni bo‘lib, sidqidil mehnatlari ortidan tomorqani obod qilib, har mavsumda sabzavot mahsulotlaridan barakali hosil yetishtirib, uy xo‘jaligida chorva, qolaversa, parranda bosh sonini ko‘paytirib, ro‘zg‘or kam-ko‘stini qoplab kelishmoqda.
Oilaviy mehnat ortidan ro‘zg‘orni butlab, to‘kin va xotirjam yashab kelayotgan Sahat Yodgorov umr yo‘ldoshi, shuningdek, o‘g‘li Akbar Yodgorov, kelini Zuhra Choriyeva hamda dastyorga aylangan 4 nafar nabirasi bilan halol-pokiza mehnatlari ortidan orzu-havaslarini ko‘rishmoqda.
O‘tgan yili kelini Zuhra Choriyeva tomonidan ilgari surilgan issiqxona qurish borasidagi taklif oilaviy ko‘llab-quvvatlanib, mahalladan imtiyozli tartibda rasmiylashtirilgan 30 million so‘m kredit mablag‘i evaziga oila 2 sotixdan iborat issiqxonasiga ega bo‘lgan. Buning evaziga tomorqachilik bilan birga, og‘ilxonasida sigir buzoq ko‘paytirilib, mehr bilan parvarishlayotgan parranda soni ham 50 boshga yetkazilgan. Bundan ko‘rinib turibdiki, sarxil mahsulot bilan birga, xo‘jalikda sut, qatiq, sariyog‘, tuxum, hatto, go‘shtga bo‘lgan ehtiyoj imkonqadar qondirilmoqda.
O‘tgan yili sinov tariqasida foydalanilgan issiqxonadan yaxshigina daromad ko‘rgan oila joriy yilda ham peshona teri evaziga kartoshka, piyoz, pomidor, bodring, qolaversa, ismaloq va turli xil ko‘katlardan barakali hosil yetishtirmoqda.
— Bultur parvarishini boshlaganimiz tovuq sonini bugunga kelib 100 boshga yetkazib, hozirda har kuniga 40 tadan oshirib tuxum olayapmiz, — deydi xonadon sohibi Sahat Yodgorov. — Ro‘zg‘ordan ortgan mahsulotni albatta, qishloqdoshlar dasturxoniga ham yetkazamiz. Mavsumiga qarab ismaloq, ko‘kat, tuxum, sut kabi mahsulotlarni sotib, yaxshigina foydaga erishmoqdamiz. Asosiysi, farzandlar, nevaralarimiz ham mehnatga bo‘yin egib, ishning ko‘zini bilib ulg‘ayishmoqda. Mehnatdan qochmaydigan odam esa hech qachon kambag‘al bo‘lmaydi.
Viloyat hokimligi matbuot xizmati