Tez kunlarda g‘o‘za defoliatsiya qilinadi
2024-08-20 15:05:00 / Yangiliklar
Defoliatsiya tadbiri sifatli va to‘g‘ri o‘tkazilganda barglarning to‘kilishi ta’minlanibgina qolmasdan, g‘o‘zadagi bo‘liq ko‘saklar 10-15 kun erta pishib yetiladi, 1-terim salmog‘i 15-20% ga oshib, yuqori sifatli xom-ashyo hajmi ko‘payadi.
Shuning bilan birgalikda, defoliant g‘o‘za kasalliklari va zararkunandalariga, ayniqsa qora shira tushgan maydonlarga samarali ta’sir etadi. Mazkur agrotadbir qora shirani keltirib chiqaruvchi g‘o‘za bitlariga barham berib, ko‘sak va tolaning chirishini kamaytiradi.
Defoliatsiyani muddatida va sifatli o‘tkazilishi paxta terish mashinalarining samarali ishlashini va qo‘l terimida ish unumini 15-20 foizga oshishini ta’minlaydi, kuzgi boshoqli don ekinlarini sifatli ekib, erta undirib olishga qulay sharoit yaratadi. Aksincha, defoliatsiya sifatsiz o‘tkazilgan yoki umuman o‘tkazilmagan g‘o‘za qator orasiga ekilgan kuzgi bug‘doy to‘liq unib chiqmaydi. Chunki, tuproqqa quyosh nurlarining yetarli tushmasligi natijasida maysalar nimjon, sarg‘imtir rangda bo‘lib, o‘z muddatida tuplamaydi, kasallikka tez chalinadi, binobarin daladan to‘liq ko‘chat olish imkoniyati boy beriladi.
Ta’kidlash kerakki, turli tabiiy va antropogen omillar ta’sirida ko‘saklar ochilishi kechikayotgan, ko‘chat siyrak bo‘lib ko‘proq ko‘sak hosil qilgan maydonlarda ko‘saklarni pishib yetilishini tezlashtiruvchi "Etefon" preparatlarini ko‘saklar 25-30% ochilgan davrda qo‘llash tavsiya etiladi. Shu bilan birga havo haroratining pasayib, defoliatsiya kechikayotgan maydonlarda desikatsiya o‘tkazish tavsiya etiladi. Defoliantlar qattiq ta’sir etuvchi hamda yumshoq ta’sir etuvchi bo‘lib ikkiga bo‘linadi. Qattiq ta’sir etuvchi defoliantlarga asosan xlorat magniy, xlorat natriy asosida ishlab chiqilgan defoliantlar (XMD 60%, Suyuq xloratmagniy 43%, O‘zDEF, Samara, Super XMD-s) kiradi. Bu defoliantlar ta’sirida barglar qurigan qovjiragan holda tushadi.
Yumshoq ta’sir etuvchi defoliantlarga "Tidiazuron" + "Diuron" tarkibi asosida ishlab chiqilgan defoliantlar (Avguron-Ekstra, D.-Ekstra, Defon, Xim-Ekstra va b.) kiradi. Bu defoliantlar g‘o‘zaga yumshoq ta’sir etib, barglar yashilligicha to‘kiladi. Kichik ko‘saklar ham pishib yetiladi. Natijada qo‘shimcha hosil olinadi va terilgan paxtani ifloslantirmaslikka erishiladi.