Farg‘onada ham odam DNKsi sud-biologik ekspertizasini o‘tkazish imkoniyati yaratildi
2024-11-05 09:00:00 / Vazirlik yangiliklari
Farg‘onada X.Sulaymonova nomidagi Respublika sud ekspertizasi markazi viloyat bo‘limining yangi binosining tantanali ochilish marosimi bo‘lib o‘tdi.
Ushbu bo‘limda o‘tkaziladigan ekspertiza turlari 17 tadan 24 taga, tadqiqot turlari esa 19 tadan 38 taga oshirilib, Odam DNKsi
sud-biologik, Sud-lingvistik, Sud-filologik, Sud-yong‘in texnik, Sud-elektrotexnikaviy, Lok-bo‘yoq materiallari va qoplamalarining, Neft mahsulotlari va yoqilg‘i-moylash materiallarining kabi yangi ekspertiza turlari joriy etilmoqda.
Yana bir muhim yangilik — Farg‘onada ham odam DNKsi sud-biologik ekspertizasini o‘tkazish imkoniyati yaratildi.
Birgina vodiy viloyatlarida faoliyat yurituvchi sud-tergov organlari tomonidan Odam DNKsi sud-biologik ekspertizasi bo‘yicha bir yilda o‘rtacha 500 ta X.Sulaymonova nomidagi Respublika sud ekspertizasi markaziga ekspertizalar tayinlangan bo‘lib, ushbu holatda 2 500 dan ortiq fuqarolarning poytaxtga kelishlariga to‘g‘ri kelmoqda.
Yaʼni, ushbu ekspertizaga oid tadqiqotlar faqat Toshkent shahrida o‘tkazilishi sababli, ko‘plab fuqarolarni ortiqcha sarf-xarajat va ovogarchiliklariga olib kelmoqda. Bu kabi misollarni boshqa ekspertiza turlari misolida ham ko‘rish mumkin.
“O‘zbekiston Respublikasida sud-ekspertlik tizimi takomillashtirish chora-tadbirlari to‘g‘risida”gi Prezident Farmonida bu kabi muammolarni bartaraf etish hamda fuqarolarimizga qulayliklar yaratish maqsadida Farg‘ona, Termiz, Urganch shaharlarida Odam DNKsi sud-biologik ekspertizasi hamda Samarqand shahrida Odam DNKsi sud-biologik ekspertizasi va Materiallar, ashyolar va buyumlar kriminalistik ekspertizasi laboratoriyalarini bosqichma-bosqich tashkil qilish belgilangan.
Samarqand viloyat hududiy bo‘limida Odam DNKsi sud-biologik ekspertizasi laboratoriyasi 2022 yilda tashkil etilgan bo‘lsa, 2023 yilda bunday laboratoriya Xorazm viloyatida ham ochildi. Endilikda, esa X. Sulaymonova nomidagi Respublika sud ekspertiza markazining Farg‘ona viloyat hududiy bo‘limida ham Odam DNKsi sud-biologik ekspertizasi laboratoriyasi faoliyati ham yo‘lga qo‘yildi.
Bu orqali fuqarolarning buzilgan huquqlari va manfaatlarini himoya qilish, jinoyatchilikni qisqa muddatlarda fosh qilish hamda sud va tergov organlarining ortiqcha ovvoragarchiligining oldini olish, tez fursatlarda sud-ekspertiza xulosalarini olishlariga sharoit yaratildi.
Adliya vazirligi Axborot xizmati