Adliya vazirligi tomonidan AQSH Xalqaro hamkorlik agentligi (USAID) bilan hamkorlikda xalqaro ekspertlar, jumladan, Buyuk Britaniyaning London universiteti Ilg‘or fanlar huquqiy tadqiqotlar institutining (IALS) fan doktori, dotsent Mariya Mousmouti ishtirokida malaka oshirish kursi o‘tkazilmoqda.

Ushbu kurs 15-19 iyul kunlari davom etib, to‘rt kun davomida vazirlik va idoranlarning mazkur yo‘nalishdagi xodimlariga qonunchilik hujjatlarini fakt va dalillarga asoslangan holda ishlab chiqish, xususan, ularning tartibga solish taʼsirini baholash (TSTB), bu jarayonga qonunchilik hujjati bevosita taʼsir ko‘rsatadigan aholi va tadbirkorlik vakillarini jalb qilish xorijiy tajriba hamda amaliy misollar yordamida master klasslar o‘tiladi.

TSTB – avvalambor, biror bir qonunchilik hujjati loyihasini yozishda yuzaga kelgan muammoni aniqlash, uni hal etishi mumkin bo‘lgan yechimlarni tahlil qilish, oqibatlarni prognoz qilish va buning natijasida aholi va davlat uchun asossiz xarajat hamda byurokratik to‘siqlarni oldini olish imkonini beradi.

Tadbir davomida tinglovchilar qonunchilik loyihalarini tayyorlashda sifat jihatidan yondashish, jamoatchilik bilan ishlash hamda taʼsirni baholash amaliyoti bo‘yicha muhim ko‘nikma va malakalarga ega bo‘lishadi.

Norma ijodkorligi jarayonlarida 2021 yildan boshlab, tartibga solish taʼsirini baholash (keyingi o‘rinlarda – TSTB) instituti joriy etilgan bo‘lib, shundan buyon ham qonunchilik hujjatlari loyihalari, ham amaldagi qonunchilik hujjatlarini taʼsiri baholab kelinmoqda.

Dastlab, faqat tadbirkorlarga taʼsir ko‘rsatadigan hujjatlarning taʼsiri baholangan bo‘lsa, 2023 yildan boshlab bunga qo‘shimcha fuqarolarning huquq, erkinlik va qonuniy manfaatlari hamda atrof-muhitga taʼsir ko‘rsatuvchi hujjatlar TSTBdan o‘tkazib kelinmoqda.

Natijada 2022-2023 yillar davomida qonunchilik hujjatlari loyihalaridan aholi va tadbirkorlarga 8,5 trln so‘mdan ortiq asossiz xarajat yuklashi mumkin bo‘lgan normalar chiqarib tashlandi.

Vazirlik tomonidan shu singari kengaytirilgan formatdagi trening, o‘quv kurslarini kelgusida ham xalqaro ekspertlarni jalb qilgan holda o‘tkazish rejalashtirilgan.