G‘afur G‘ulom va Oybek uy-muzeylarida mukammal ta’mirlash ishlari olib boriladi
2025-07-04 13:55:00 / Yangiliklar
Xabaringiz bor, joriy yilning 26-iyun kuni Madaniy meros agentligi huzuridagi Ilmiy-ekspert kengashining navbatdan tashqari yig‘ilishi Toshkent shahrida bo‘lib o‘tgan edi. Ushbu majlisda Kengash a’zolari tomonidan 9 ta dolzarb loyiha bo‘yicha yakuniy xulosalar berildi. Loyihalar Toshkent shahri va Buxoro viloyatiga taalluqli bo‘lib, Kengash tomonidan ayrim masalalar ma’qullandi.
Jumladan, Toshkent shahrida joylashgan G‘afur G‘ulom va Oybek uy-muzeylarining binolarini mukammal ta’mirlash va binolarda muhandislik kommunikatsiya ishlarini olib borish loyihalari ma’qullandi. Undan tashqari, Buxoro viloyatining “Eski shahar” qismida joylashgan “Passaj-1” madaniy meros obyektini muzeylashtirish loyihasi tarixiy yodgorlikka ziyon yetkazmaslik sharti bilan tasdiqlandi.
Shuningdek, Buxoro shahrida joylashgan “Qadimiy hovli” (Hovli Poyon) madaniy meros obyektini Buxoro shahridagi Jadidlar merosi davlat muzeyiga moslashtirish, restavratsiya qilish ishlari bo‘yicha loyihasi Kengash a’zolari tomonidan joyiga chiqqan holda o‘rganilib yakuniy xulosa berilishi tavsiya etildi.
Yuqoridagi loyihalar tavfsilotlari bilan Agentlikning rasmiy veb-saytida tanishishingiz mumkin.