O‘zbekiston Respublikasi Oliy taʼlim, fan va innovatsiyalar vazirligi

Xususan, “QS Quacquarelli Symonds” xalqaro reyting agentligining Yevropa va Markaziy Osiyo bo‘yicha sammitini 2025 yilda O‘zbekistonda o‘tkazish rejalashtirilmoqda. Shuningdek, ta’lim eksportini kengaytirish, global ilmiy-ta’lim maydonida mamlakatimiz mavqeini oshirish, xorijiy talabalarni O‘zbekiston oliy ta’lim muassasalariga jalb etish bo‘yicha qo‘shma dastur ishlab chiqilishi belgilandi.

Forum doirasida “Pearson Education Limited” kompaniyasi bilan hamkorlikda, 2025/2026-o‘quv yilidan boshlab respublikaning 14 ta texnikumida xalqaro ta’lim dasturlarini joriy etish yuzasidan shartnoma imzolandi.

Mazkur hujjatga muvofiq, hududlardagi ish beruvchilar ehtiyoji asosida har bir texnikumga 120 nafardan, jami 1680 nafar o‘quvchi qabul qilinadi. Ushbu texnikumlarda 8 ta malaka yo‘nalishi bo‘yicha 15 ta kasb va mutaxassislik o‘qitilishi rejalashtirilgan.

Shuningdek, xalqaro ta’lim dasturlarini muvofiqlashtirish bo‘limlari faoliyati yo‘lga qo‘yilib, BTEC malaka modullari milliy ta’lim dasturlariga integratsiya qilinadi.

Bundan tashqari, O‘zbekiston Respublikasi Prezidentining yoshlar bilan ochiq muloqotida belgilangan vazifalarni amalga oshirish doirasida dunyoning eng nufuzli TOP-10 oliygohlaridan Oksford universiteti, Kembridj universiteti hamda London Imperial kolleji bilan uchrashuvlar o‘tkazildi. Muzokaralarda o‘quvchi va talabalar uchun ajratiladigan kvotalar sonini oshirish masalasi ko‘rib chiqildi.

Muloqotda qayt etilganidek, mazkur hamkorliklar O‘zbekiston ta’lim tizimini xalqaro standartlarga mos ravishda rivojlantirishga xizmat qilishi ta’kidlandi.